Timi hɛ te câ tù hā ve
P: âa, nɔ̀-hɨ Hwēi-tàʔ ɔ̄ chɛ̂ ve Lâhū yâ chi tê mō Thây mû-mì ɔ̄ gà la ve qhà-nî qhɔ̀ʔ gà ò le.
Thûyì: âa, chi qhɔ̀ʔ lɛ̀ Thây mû-mì ɔ̄ gà la ve tí qo tê chi nî qhɔ̀ʔ qhe gà ò hɛ́.
P: yàʔ la thâ qhɔ̀ tê hapa àʔ yàʔ la ve le.
kâʔ-yân àʔ yàʔ la ve lâ, mû-cha-yân àʔ yàʔ la ve lâ.
Ty: âa, chi ve ɔ̀-yân tí qo ŋà qha-dɛ̀ʔ-dɛ̀ʔ mâ šī phɛ̀ʔ qôʔ-ma.
ô thâ ŋà yâ-nɛ̀ phɛ̀ʔ ve pa-tɔ.
P: ô thâ nɔ̀ a-šàʔ qhà-nî qhɔ̀ʔ gà ò le, nɔ̀ yàʔ la thâ.
Ty: âa, tê chi qhɔ̀ʔ ɛ̀ cɛ lɛ̀ gà ò hɛ́.
P: chi qhe yàʔ la thâ, qhà-nî ni g̈a há ve le, yàʔ-qɔ phɨ̂ ɔ̄.
Ty: alôo, nô ɔ̄ tàn phɔ la lɛ là ve Thây mì-gɨ̀ ɔ̄ gà la ve tí qo à-là-qhe tê hapa-pa qhe gà ve yò.
P: Thây mû-mì ɔ̄ gà la thâ à-thòʔ-ma te … à-thòʔ-ma tàn te câ ve le, nɔ̀-hɨ ɔ̀-mî ɔ̀-yâ hu tù.
T: gà la ve tê qhɔ̀ʔ thâ ŋà-hɨ šathê lón gɛ tha-ŋâ câ ve yò.
tê ni ve ŋâ bàʔ kə̄n lɛ câ-tù-dɔ̀-tù tê-phā qha-pə̀è ɔ̄ šathê lón ŋà-hɨ thàʔ ga lâ ve yò.
P: à-thòʔ-ma ɔ̀-cə̀ tha-ŋâ câ ve le, šathê lón gɛ.
Ty: âa, laý-cə̀ kán te ve yò.
là kho tê g̈ɨ̀ phɔ̂ ɔ̀-khɨ́-pɨ̄ tê g̈ɨ̀ qɔ̂ g̈àʔ ve chi qhe tê g̈ɨ̀ te ve yò.
P: ô tê qhɔ̀ʔ hɛ mâ tàn te šē lâ.
Ty: âa, ca chɛ̂ la tê qhɔ̀ʔ tí qo mâ te šē hɛ́.
thâ cɛ ŋâ câ ve yò.
T: ô ve tê qhɔ̀ʔ thâ ɔ̄ ŋà-hɨ hɛ mâ te šē.
gà la ve tê qhɔ̀ʔ thâ lɛ̀ šathê gɛ tha-ŋâ lɛ, tê ni pon tê ni tê qhɔ̀ʔ qha yɨ ŋà-hɨ chi qhe kán cɛ te câ chɛ̂ ve yò.
P: chi qhe te câ lɛ šathê lin pèʔ lâ ve phu ɔ̄ cà-qha vɨ̀ câ ve lê.
Ty: âa, cà-qha tí qo ô thâ vɨ̀ câ tù mâ lō.
yɔ̂ cā lâ ve yò.
ɔ̀-chî kàʔ, ɔ̄ kàʔ qha-pə̀è ve tí qo.
P: chi qhe te šathê lón gɛ te tha-ŋâ câ ve qhà-nî qhɔ̀ʔ gà ò ve le.
mâ hêʔ qo qhà-mɔ-mɔ g̈a te câ ve le.
T: chi ve ɔ̄ šathê gɛ tha-ŋâ ve tí qo, tàn là ve tê qhɔ̀ʔ qha-yɨ lɛ, nî qhɔ̀ʔ tê qhɔ̀ʔ thâ, ŋà-hɨ hɛ te lɛ hɛ-ŋə̂ mɨ̀ câ ve yò.
lɛ g̈a câ la pə̀ ɔ̀-qhɔ̀ʔ-nɔ́ thâ, thâ-ŋâ ve ɔ̀-cə̀ thɔ̂ ŋà-hɨ te qo ŋà-hɨ phu g̈a ve yò.
P: chi hɛ-ŋə̂ te ve ɔ̀-cə̀ chi ɔ̀-kā qɔ ɔ̄, à-thòʔ-ma ɔ̀-cə̀ qɔ̀ʔ te ve le.
vàʔ hu g̈âʔ hu ve láy-cə̀ qɔ̀ʔ cɔ̀ šɔ̄ lâ.
Ty: âa, láy-cə̀ te ve yò.
vàʔ hu g̈âʔ hu, vàʔ g̈âʔ hɔ̂ ve tê g̈ɨ̀, phu tê g̈ɨ̀ a-cí-cí qɔ̀ʔ g̈a lɛ, ô qhe qɔ̀ʔ te qay lɛ, a-cí-cí cɔ̀ ve yò.
P: chi bə̀ʔ ŋà a-cí šī gâ ve ɔ̄ nɔ̀-hɨ chò kàʔ hɛ te câ ve hɛ thu câ ve qhe ve, Thây a-cô-yàʔ ve Thây lâthâbân ve ɔ̀-lî ɔ̀-qhâ qhà-qhe cɔ̀ ve le.
qhà-qhe te tɛ ā ve le, yɔ̂-hɨ.
T: chi bə̀ʔ Thây mì-gɨ̀ ɔ̀-qhɔ lo ŋà-hɨ chò kàʔ g̈a mɨ̀ câ ve tí qo lɛ̀, Thây a-mîʔ jɔ̂mɔ̂ a-mîʔ te ā ve tí qo, hɛ mâ g̈a thu.
yàʔ-qhâ thɔ̂ ŋà-hɨ nî khom mì-gɨ̀ ɔ̀-qhɔ lo chɛ̂ ve pa-tɔ, a-cí-cí qo lɛ̀ g̈a te câ ɔ.
g̈a te câ ve thɔ̂ qɔ̀ʔ šū-šàʔ jâ ve tê cə̀ phɛ̀ʔ ve yò.
ɔ̀-lɔn qo, tā-nòʔ tê phā tê khɨ tê khɨ tâʔ la lɛ, ŋà-hɨ hɛ te kɨ̀ lo ca ni la ve tê yân thâ, yɔ̂-hɨ ŋà hɨ thàʔ phɛ gâ ve yò.
yàʔ-qhâ thɔ̂ tê pɔ̂ʔ kàʔ ŋà-hɨ thàʔ lù tù te mâ phɛ̀ʔ.
P: à-thòʔ-ma te lɛ yɔ̂-hɨ hɛ mâ thu cɨ gâ ve le qôʔ ve le, qhe qo.
T: yɔ̂-hɨ qôʔ ve hɛ thu ve qo í-kâʔ fī la cê.
qhɔ-qhôʔ-lɔ̀-qhôʔ hɛ mâ-mâ thu ve qo vên qhɔ í-kâʔ mâ cɔ̀ cê.
yɔ̂-hɨ chi qhe qôʔ ve yò.
yàʔ-qhâ thɔ̂ ŋà-hɨ Lâhū yâ ɔ̀-pon lɛ̀ hɛ mâ g̈a thu câ qo phɛ̀ʔ kɨ̀ mâ cɔ̀.
lɛ phu-ši ca g̈a kɨ̀ kàʔ mâ cɔ̀.
ti-mi kàʔ mâ cɔ̀ ve pa-tɔ, ŋà-hɨ chi qhe g̈a tùʔ-khān chɛ̂ ve yò.
P: nɔ̀-hɨ hɛ thu ve chi ɔ̄, hɛ tê kà ɔ̄ qhà-ni qhɔ̀ʔ g̈a te câ jɔ le, tê kà tê kà qo.
qhà-nî qhɔ̀ʔ pə̀ qo ɔ̀-šɨ́ g̈a qɔ̀ʔ tàn thu ve le.
Ty: âa, hɛ tí qo te pêʔ ve tí qo, tê qhɔ̀ʔ thâ lɛ̀ dàʔ à.
nî qhɔ̀ʔ tê qhɔ̀ʔ lɛ̀ ɔ̀-šɨ́ tê qhɔ̀ʔ qhe a-cí mâ gà ve yò.
T: yò.
hɛ-g̈ɔ̂ g̈ɔ̂ʔ câ ve ɔ̀-lɔn chi qhe yò.
tê pɔ̂ʔ-pɔ̂ʔ mì-gɨ̀ mâ dàʔ kɨ̀ g̈a qo, tê qhɔ̀ʔ kàʔ tê qhɔ̀ʔ tí thâ kàʔ qha-dɛ̀ʔ-dɛ̀ʔ mâ dàʔ.
nî qhɔ̀ʔ tê qhɔ̀ʔ thâ gà qo, ɔ̀-cɛ̀ dàʔ thɔ̂ ɔ̀-nu mâ cɔ̀ ve yò.
P: qhe te qo ɔ̄, ɔ̀-šɨ́ g̈a tàn thu câ ve lê.
qhe qo ŋà g̈a kâ ve qhe ɔ̄ qhe, hɛ thu ve qo šɨ̂ʔ-cɛ̀ tɔ̂ʔ bà mâ jâ qôʔ ve chi.
šɨ̂ʔ-cɛ̀ tê cɛ̀ ve a-šàʔ chɔ tê g̈â ve a-šàʔ qhe-ma-ma mɔ ve qôʔ ve ma.
šɨ̂ʔ-cɛ̀ tê cɛ̀ ve ɔ̄, ŋâ chi qhɔ̀ʔ khɔ̀ʔ chi qhɔ̀ʔ qhe chɛ̂ ve qôʔ ve ma.
šɨ̂ʔ-cɛ̀ chi ve kàʔ Thây mû-mì ɔ̀-pon ɔ̀-bon cɔ̀ jâ qôʔ ve.
Thây mû-mì phu g̈a ve kàʔ chi šɨ̂ʔ-cɛ̀ àʔ tí cɔ̀ ve qôʔ ve.
qhe te lɛ mâ thu bà cɨ gâ qôʔ ve.
qhe te qo ɔ̄ Lâhū yâ ɔ̀-pon ɔ̄ hɛ… šɨ̂ʔ… hɛ mâ g̈a thu qhe qo qhà-qhe te g̈a câ tù le, qôʔ ve chi ɔ̄.
chi ɔ̄… qhà-qhe te dɔ̂ tā ve le, chi…
hɛ mâ thu cɨ gâ qôʔ qo ɔ̄.
T: yɔ̂-hɨ ɔ̄ chi qhe qôʔ ve…
qhɔ-qhôʔ-lɔ̀-qhôʔ hɛ tê pêʔ tí g̈a te câ tù ɔ̀-pon ŋà-hɨ Lâhū yâ àʔ yɔ̂-hɨ chi qhe te cɨ gâ ve yò.
yɔ̂-hɨ qôʔ ve í-šī láy cə̀ vɨ̀ ti lɛ, là ti lɛ, kàfì ti lɛ, hɛ te câ gâ ve qo, hɛ-lɔɛ̂ʔ g̈a te câ ve yò cê.
chi thàʔ pa-tɔ ŋà-hɨ Lâhū yâ ɔ̀-pon lɛ̀ chi qhe te ve tí qo, phɛ̀ʔ la kɨ̀ lɛ̀ mâ cɔ̀.
yàʔ-qhâ thɔ̂ ɔ̀-g̈û-šɨ̄ phɔ̂ ŋà-hɨ qhà-qhe te lɛ g̈a-câ-g̈a-dɔ̀ te qay tù ve tí qo ɔ, Thây jɔ̂mɔ̂ ŋà-hɨ thàʔ mâ ga lâ ve qhe qo, ŋà-hɨ ɔ̀-pon lɛ̀ dɔ̂-hā tù ɨ̄ jâ ve tê cə̀ phɛ̀ʔ ve yò.
tê lɔn qo ŋà-hɨ Lâhū yâ tê cə̀ lɛ̀ hɛ mâ g̈a te câ qo ti-mi kàʔ mâ cɔ̀.
phu-ši kàʔ mâ cɔ̀.
vàʔ g̈âʔ a-cí-cí cɔ̀ qo qha-pə̀è hɔ̂ câ pə̀ lɛ, ɔ̄ g̈a vɨ̀ câ tù yò.
lɛ chi ɔ̀-qhôʔ kàʔ və̀ʔ-qâ tê-phā kàʔ mâ g̈a və̀ʔ lɛ, šu thàʔ g̈a yàʔ-tɔ qay tù ve tê cə̀ yò.
P: chi nɔ̀-hɨ… hɛ te lɛ tê qhɔ̀ʔ nî qhɔ̀ʔ gà qo, hɛ chi mâ dàʔ o qo, bà ve lâ.
qhe bà tɛ ā qo hɛ-šā phɛ̀ʔ qay ve lê.
hɛ-šā phɛ̀ʔ ve lɛ̀ qhà-nî qhɔ̀ʔ gà qo qɔ̀ʔ te câ phɛ̀ʔ ve le, hɛ-šā chi àʔ.
T: hɛ tê pêʔ te câ pə̀ ɔ̀-qhɔ̀ʔ-nɔ́, tê qhɔ̀ʔ tí te câ ve qo ɔ̀-qhɔ̀ʔ-nɔ́ ŋâ qhɔ̀ʔ qhe qo hɛ qɔ̀ʔ te câ phɛ̀ʔ ve yò.
lɛ hɛ-g̈ɔ̂ g̈ɔ̂ʔ ve qo hɛ-g̈ɔ̂ lɛ̀ tê qhɔ̀ʔ g̈ɔ̂ʔ ve qo, ŋâ qhɔ̀ʔ qhe qɔ̀ʔ mɔ,…
tê chi qhɔ̀ʔ qhe thâ ŋà-hɨ qɔ̀ʔ te câ phɛ̀ʔ ve yò.
P: hɛ-gɔ̂ gɔ̂ʔ ve qôʔ ve ɔ̄ chi, nî pɔ̂ʔ te ve qôʔ ve lâ.
ŋà qha-dɛ̀ʔ a-cí mâ šī qôʔ-ma.
qhà-qhe te g̈ɔ̂ʔ ve le.
T: yò.
hɛ-g̈ɔ̂ g̈ɔ̂ʔ ve qôʔ ve lɛ̀, nî pɔ̂ʔ te ve…
hɛ tê pêʔ ɔ̀-qhɔ tí nî qhɔ̀ʔ ti câ ve thàʔ qôʔ ve yò.
hɛ-g̈ɔ̂ g̈ɔ̂ʔ ve qôʔ ve cɨ́-kɨ̀ lɛ̀…
qhe qo hɛ tê pêʔ ve ɔ̀-qhɔ lə́ nî qhɔ̀ʔ lɛ g̈ɔ̂ʔ ve qo tê chi qhɔ̀ʔ qhe g̈a lɔ ve yò.
tê chi qhɔ̀ʔ lɔ pə̀ qhɔ̀ʔ-nɔ́, ŋà-hɨ a-cí-cí g̈a câ ɔ.
qha-dɛ̀ʔ-dɛ̀ʔ lɛ̀ mâ dàʔ šē.
P: chi bə̀ʔ Thây Lâthâbân qôʔ ve ɔ̄ lê, nɔ̀-hɨ hɛ qhe lay kà ɔ̀-ti ɔ̀-šɨ́ mâ g̈a thu câ tù, yɔ̂ qôʔ ve ɔ̄, tê kà tí g̈a te câ tù qo ɔ̄ chi, ɔ̀-khɨ̂ hɛ ɔ̀-pī chi àʔ kàʔ tê pɔ̂ʔ tê qhɔ̀ʔ le le ɔ̀-khɨ̂ kə lɛ te câ qôʔ ve chi ɔ̄, nɔ̀-hɨ qhà-qhe dɔ̂ g̈a ve le.
phɛ̀ʔ tù lâ.
a phɛ̀ʔ tù lâ.
T: chi ve ti qo, ŋà-hɨ dɔ̂-ni ve tê yân thâ lɛ̀, qhɔ-qhôʔ-lɔ̀-qhôʔ lo ɔ̀-khɨ̂ kə câ ve tê cə̀ lɛ̀ mâ-mâ hā jâ ve yò.
ɔ̀-lɔn qo mì mâ tɔ̄ ve thàʔ pa-tɔ, ɔ̀-khɨ̂ kə ve tê yân, mû-yè là qo, tê pɔ̂ʔ tí qha-pə̀-è ɔ̀-khɨ̂ thàʔ yù qay ve pa-tɔ, ŋà-hɨ ɔ̀-bon mâ cɔ̀ hɛ́ dɔ̂ ve yò.
P: qhe te qo ɔ̄ ɔ̀-lɔ̂ʔ ɔ̀-lɔ̂ʔ te a qo, â phɛ̀ʔ lɛ lâ.
T: ɔ̀-lɔ̂ʔ ɔ̀-lɔ̂ʔ te lɔ qôʔ qo, mì hā jâ ve thàʔ pa-tɔ te tí qo lɛ̀ g̈a tù yò.
yàʔ-qhâ ɔ̀-yân lɛ̀ mâ-mâ šô qay lɛ, ɔ̀-yân mɔ chwɛ ve ɔ̀-qhɔ lo g̈a hā g̈a g̈ɔ̂ tù yò.
yàʔ-qhâ thɔ̂ ɔ̀-lwɛ̂ʔ te ve tê cə̀ lɛ̀, lə́ lɛ dàʔ jâ ve lɛ̀, ɔ̀-tɔ̄ mâ hêʔ qo, ŋà-hɨ Lâhū yâ ɔ̀-pon hā jâ ve tê cə̀ phɛ̀ʔ ve yò.
ɔ̀-lɔn qo, ɔ̀-lwêʔ te kɨ̀ mâ cɔ̀.
mì hā jâ ve thàʔ pa-tɔ…
ɔ̀-lwêʔ te g̈a thâ gà qo lɛ̀, qhà-ma-ma… qhà-mɔ-mɔ g̈a te tù ve kàʔ mâ šī ò.
P: nɔ̀-hɨ hɛ thu ā ve qhɔ tê qhɔ ɔ̄ qhe, ɔ̀-lɔ̂ʔ te qo ɔ̄, qhà-nî qhɔ̀ʔ qhe g̈a te tù ve le…. ɔ̀-lɔ̂ʔ qha-dɛ̀ʔ phɛ̀ʔ tù.
T: ŋà dɔ̂ ve hɛ thu ā kɨ̀ ɔ̀-qhɔ lo ɔ̀-lɔ̂ʔ qɔ̀ʔ te ve tê cə̀ lɛ̀, qhɔ qhôʔ lɛ̀, hɛ ɔ̀-lɔ̂ʔ te ve tí qo lɛ̀, hɛ tê pêʔ ve ɔ̀-qhɔ lo, hapa nî mà qɔ̂ jɔ ve qo nî qhɔ̀ʔ šɛ̂ʔ qhɔ̀ʔ qhe mâ hêʔ qo, hɛ tê pêʔ ve ɔ̀-qhɔ ɔ̀-lɔ̂ʔ te mâ pə̀.
P: qhe qo nɔ̀-hɨ chi hɛ ɔ̀-lɔ̂ʔ tí te câ ve qo ɔ̄ ɔ̀-lɔ̂ʔ tí te chɛ̂ ve qo ɔ̄,… chi ɔ̀-lɔ̂ʔ te chɛ̂ ve tê qhɔ̀ʔ nî qhɔ̀ʔ ɔ̄ qhe, qhà-qhe te câ a-tɛ̀ʔ te ve câ tù ve le.
à-thòʔ-ma phûʔ câ tù ve le.
T: chi ve ɔ̀-yân ɔ̀-qhɔ lo ŋà-hɨ Lâhū yâ qôʔ chɛ̂ ve chi qhe yò.
dɔ̂ mâ tɔ̂ʔ.
qhà ve tê cə̀ thàʔ ŋà-hɨ g̈a câ tù ve tê cə̀ lɛ̀, ŋà-hɨ dɔ̂ mâ tɔ̂ʔ.
ɔ̀-lɔn qo, hɛ tí te lɛ cà tí ti thɔ̂, ɔ̀-lɔ̂ʔ mâ te kàʔ, tê g̈â-g̈â qo câ mâ lɔ̀ʔ.
tê qhɔ̀ʔ-qhɔ̀ʔ qo lɔ̀ʔ ve, tê qhɔ̀ʔ-qhɔ̀ʔ qo mâ lɔ̀ʔ.
chi qhe ɔ̀-lɔ̂ʔ g̈a qɔ̀ʔ te chɛ̂ ve ɔ̀-yân ɔ̀-qhɔ lo lɛ̀, vàʔ hu g̈âʔ hu ve mâ g̈a o.
mâ g̈a hɔ̂ câ o.
mâ tân o.
qhe qo vàʔ hu g̈âʔ hu ā ve cā-cā lɛ ɨ̄ la lɛ, g̈a qɔ̀ʔ hɔ̂ câ tù ve cā tù kàʔ mâ cɔ̀.
P: ôo, qhe qo lɛ̀, šālàʔ nɔ̀ qôʔ ve qhe-lê lɛ̀, chi ɔ̀-lɔ̂ʔ te lɛ mì-khɨ̂ kə te câ ve tí qo lɛ̀ â phɛ̀ʔ tà hɛ́.
phɛ̀ʔ lɛ̀ phɛ̀ʔ ve yò.
yɔ̂-hɨ tê ga lâ tɛ̀tɛ̀ qo lɛ̀ lê.
yɔ̂-hɨ qhe mì-gɨ̀ gûʔ ve qhe càʔ qhe, yɔ̂ hɨ qhâ yɔ̂-hɨ ca te lâ ca gûʔ lâ qo lɛ̀, phɛ̀ʔ ve yò.
yàʔ-qhâ qhâʔ chi tê qhâʔ ni qhâʔ ɔ̀-pon qhe chɔ qha-pə̀è ɔ̀-pon gûʔ ve tí qo lɛ̀, yɔ̂-hɨ kàʔ phɛ̀ʔ bɔ̀ à hɛ́ dɔ̂ ve qôʔ-ma.
nɔ̀ qhà-qhe te dɔ̂ ā ve, chi qhe ve.
T: ŋà thɔ̂ kàʔ chi qhe dɔ̂ ve yò.
yɔ̂-hɨ ŋà-hɨ àʔ ga lâ ve tê cə̀ lɛ̀ a-cí cɛ tí ŋà-hɨ thàʔ ga lâ phɛ̀ʔ ve yò.
ɔ̀-lɔn qôʔ qo, ŋà-hɨ ve chɛ̂ kɨ̀ yɛ̀ cì-khɨ̂ gûʔ cɨ ve kàʔ qha-dɛ̀ʔ-dɛ̀ʔ mâ te gâ.
chi thàʔ pa-tɔ, yɔ̂-hɨ a -šô-yàʔ ve càʔ-qhən yù lɛ ŋà-hɨ thàʔ gûʔ lâ ve tê cə̀ lɛ̀, tê qhâʔ lɛ nî qhâʔ ɔ̀-pon te g̈a thâ gà qo lɛ̀ yɔ̂-hɨ lɛ̀ mâ te lâ tà hɛ́.
ŋà dɔ̂ ve qo, tê qhâʔ ɔ̀-pon kàʔ te mâ g̈a tà.
ɔ̀-lɔn qôʔ qo yɔ̂-hɨ phu-ši tí qo cɔ̀ mâ à.
càʔ-qhən thɔ̂ kàʔ lay qhən cɔ̀ ve yò.
yàʔ-qhâ thɔ̂ yɔ̂-hɨ qhɔ-qhôʔ-yâ thàʔ qha-dɛ̀ʔ-dɛ̀ʔ ga pî tù ve ɔ̄ yɔ̂-hɨ ve ni-ma ɔ̀-qhɔ lo mâ dɔ̂ gà šē.
P: qhe qo yàʔ-šɛ ŋà qôʔ ve qhe-lê lê, nɔ̀-hɨ qhe, qhe, qhɔ qhôʔ ɔ̄ yɔ̂-hɨ hɛ mâ thu câ cɨ gâ qôʔ qo ɔ̄, chi, mə̂n láy mə̂n cɔ̀ ve ɔ̀-tɔ̄ láy kà cɔ̀ ve qhe ve ɔ̄, šu mû-mì chɔ ca ni la thâ qo ɔ̄, "Thây mû-mì chi ɔ̄ ɔ̀-tɔ̄ pɛ jâ. te câ kɨ̀ mɨ̀ câ kɨ̀ pɛ jâ lɛ, ɔ̄ tí qo mâ mə̀ʔ šɨ," qhe qôʔ ā ve lê.
qhe qo ɔ̄, chi qhe ve ɔ̀-tɔ̄ qhe thə̄n-lón qhe ca lɔ̀ qo mâ g̈a lâ.
T: yò.
ɔ̀-lɔn chi tí qo chi qhe yò.
ŋà-hɨ nîʔ-kho ɔ̀-hó cɔ̀ ve.
ɔ̀-tɔ̄ ô ɔ̀-tɔ̄ tê kà cɔ̀ ve, ca lɔ̀ ve tê yân thâ ɔ̄, yɔ̂-hɨ qôʔ ve, "šɨ̂ʔ-cɛ̀ ɨ̄ jâ lɛ pèʔ lâ mâ phɛ̀ʔ" cê.
lɛ ni lɔn tê lɔn qôʔ qo, ɔ̀-kà ɔ̀-nu thə̄n-mə̂n thɔ̂ láy mə̂n cɔ̀.
ɔ̀-tɔ̄ lay kà cɔ̀ thɔ̂ kàʔ, tê kà-kà qo šâthê ve, tê kà-kà qo a-cú-yàʔ ve, tê kà-kà qo ko-pa-mâyʔ ve, chi qhe qôʔ lɛ vɛ tā ve, ŋà-hɨ Lâhū yâ ɔ̀-pon ca g̈a kɨ̀ mâ cɔ̀.
P: chi yɔ̂-hɨ qôʔ tā ve ko-pa-mâyʔ qôʔ ve chi, chi ve ɔ̀-tɔ̄ chi ve tê mà qo ô ve phâ ve, ô te mà qo šathê ve qôʔ qo, yɔ̂-hɨ te câ ve qo tèʔ-chí kàʔ te câ ve â mɔ̀. chi qhe tí bà á ve â hêʔ lâ.
T: yò. yɔ̂-hɨ qhe lê ve qhe te vɛ tɛ tā ve yò. lɛ yɔ̂-hɨ tèʔ-chí te ve kàʔ mâ mɔ̀. yàʔ-qhâ yɔ̂-hɨ vɛ tā ve qo ŋà-hɨ qhɔ-qhôʔ-yâ ɔ̄ yɔ̂-hɨ thàʔ g̈â mâ phɛ̀ʔ.
: chi bə̀ʔ ɔ̄, ŋà šī gâ ve lɛ̀ lê.
chi ŋà-hɨ Lâhū chi ɔ̄, hɛ te ve qôʔ ve hɛ tàn te ve tê ni te lɛ cà gɨ̀ʔ ve thâ qha gà, qhà-qhe te qay ve lê, tê tɔn pə̀ tê tɔn, ô ve lê, chi qhe ve šī gâ à.
ɔ-lɔ́-pə̂ thâ hɛ thu kɨ̀ ɔ̀-ti ca ve, hɛ thu kɨ̀ ɔ̀-ti ca g̈a pə̀ qo qhà-qhe te šɨ̂ʔ te thu ve le.
qhà-nî ni g̈a thu ve le, qhe ve lê.
T: ŋà-hɨ Lâhū yâ hɛ-ŋə̂ mɨ̀ câ ve tí qo chi qhe yò.
ɔ̀-qɔ́-pə̂ thâ lɛ̀ hɛ g̈a phɔ̂ ve yò.
hɛ phɔ̂ pə̀ qhɔ̀ʔ-nɔ́ hɛ thu ve.
hɛ thu ve tê yân lɛ̀ à-là hapa nî mà qhe g̈a thu ve yò.
lɛ hɛ thu pə̀ qhɔ̀ʔ-nɔ̂, hɛ tú ve.
hɛ tú ve ɔ̄, pə̀ ɔ̀-qhɔ̀ʔ-nɔ́ qo, hɛ ji ve.
hɛ ji ve tê yân tí qo qhà-mɔ-mɔ lɛ̀ mâ hêʔ.
tê ší nî ší cɛ tí yò.
lɛ g̈a qɔ̀ʔ ti qay ve ɔ̀-yân ɔ̀-qhɔ lo qo hapa tê mà lɛ tê qhô qhe ŋà-hɨ cà g̈a ti ve yò.
chi te pə̀ ɔ̀-qhɔ̀ʔ-nɔ́ qo ŋà-hɨ g̈ə̀ʔ ve ɔ̀-yân thɔ̂ kàʔ chi qhe yò.
ti pə̀ qo g̈a mùʔ ve yò.
mùʔ ve ɔ̀-yân thɔ̂ kàʔ chi qhe yò.
tê qhɔ̀ʔ-qhɔ̀ʔ qo, hɛ te câ ve qɔ̀ʔ mùʔ ná jâ ve pa-tɔ, làʔ-há mùʔ pə̀ mâ phɛ̀ʔ.
hapa tê mà qhe kàʔ g̈a mùʔ ve yò.
hapa nî mà qhe kàʔ g̈a mùʔ ve yò.
ná jâ ve qo g̈ə̀ʔ thâ qha-gà kàʔ g̈a mùʔ ve yò.
lɛ g̈ə̀ʔ ve ɔ̀-yân tí qo qhà mɔ-mɔ lɛ̀ mâ hêʔ.
hɛ te ɨ̄ pā qo ɔ̀-yân hapa tê mà qhe, hɛ mâ ɨ̄ pā qo nî ší lɛ šɛ̂ʔ ší qhe cɛ tí g̈ə̀ʔ... g̈a g̈ə̀ʔ ve yò.
P: qhe qo nɔ̀ yàʔ šɛ hɛ phɔ̂ ve qôʔ ve qhà-qhe te phɔ̂ ve le.
lɛ hɛ ji ve qôʔ ve qhà-qhe te ji ve le.
ŋà a-cí mâ šī.
hɛ phɔ̂ ve lɛ hɛ ji ve chi ɔ̄.
qhà-qhe te ji te phɔ̂ ve le.
T: hɛ phɔ̂ ve qôʔ ve lɛ̀ chi qhe yò.
mû-ni ɔ̀-yân thâ g̈a phɔ̂ ve yò.
mùʔ chi phɔ̂ pɛ̄ qo mùʔ yɔ̂ mâ cɔ̀ la ve pa-tɔ hɛ mâ ná qôʔ ve ŋà-hɨ Lâhū .
chi thàʔ pa-tɔ tê nàʔ g̈a phɔ̂ ve.
hɛ ji ve qôʔ ve kàʔ chi qhe yò.
hɛ tú pə̀ ɔ̀-qhɔ̀ʔ-nɔ́ mâ tòʔ ve ɔ̀-cə̀ tê-phā qha-pə̀è thàʔ tê gɛ qɔ̀ʔ yù phôʔ lɛ tú kə ve thàʔ hɛ ji ve qôʔ ve yò.
P: nɔ̀ qôʔ ve hɛ phɔ̂ ve qôʔ ve ɔ̄ šɨ̂ʔ-cɛ̀ lón qhe ve ɔ̄ mâ thu bà šē lê.
mâ thu bà šē thâ qhe lɛ, mùʔ a-cí a-cí te tɔ̂ʔ bà pə̀ ve lê, qhe te ve, te phɔ̂ bà ve qhe, qhe ve àʔ qôʔ ve lê.
T: yào.
ô qhe ve thàʔ qôʔ ve yò.
tê pɔ̂ʔ tí šɨ̂ʔ-cɛ̀ ɔ̀-hɔ́ qha cɔ̀ ve mùʔ tê-phā qha-pə̀è thàʔ phɔ̂-pɛ̄ ve.
ô ve phɔ̂-pɛ̄ ve ô ve ɔ̄ qhe-lê phɔ̂-pɛ̄ ve tê cə̀ mâ hêʔ.
ɔ̀-khɨ̂ phɛ̀ʔ…
yɔ̂ kɨ̂ qay qo ɔ̀-khɨ̂ phɛ̀ʔ qay ve lɛ cà tê-phā kàʔ dàʔ jâ ve.
P: qhe qo nɔ̀-hɨ cà g̈ə̀ʔ thâ qhà-qhe te g̈ə̀ʔ ve le.
ga dàʔ ve lâ.
mâ hêʔ qo, a-šu yɔ̂ qhâ yɔ̂ te g̈ə̀ʔ ve lâ.
T: ŋà-hɨ Lâhū yâ cà g̈ə̀ʔ ve tê yân thâ, mə̂n qhɔ chɔ qha-šū-šū ga dàʔ ve tê cə̀ tí qo mâ hêʔ.
tê pɔ̂ʔ-pɔ̂ʔ chɔ tê g̈â-g̈â cà g̈ə̀ʔ mâ phɛ̀ʔ.
chɛ̂-hā-cɔ̀-hā lɛ, nà ve gɔ̀ ve tê yân, ŋà-hɨ g̈a mɔ̀ ve tê yân thâ, tê qhâʔ tê lɔ̀ qha-pə̀è qay lɛ yɔ̂ gɛ g̈a ga pî ve yò.
mâ nà mâ gɔ̀ ve qo, chɔ tê g̈â le-le hɛ te ve thàʔ pa-tɔ, hɛ tê pêʔ ɔ̀-qhɔ lo tí te ve mâ hêʔ ve pa-tɔ, chi tê g̈â lɛ ô tê g̈â gɛ qay ve ɔ̀-yân tí qo mâ cɔ̀.
nà ve gɔ̀ ve tê cə̀ lɛ̀ ŋà-hɨ qay lɛ yɔ̂-hɨ thàʔ ga pî ve yò.
P: chi bə̀ʔ ɔ̄ qhe cà g̈ə̀ʔ ve ɔ̀-lɔn a-cí šī gâ à.
cà g̈ə̀ʔ… cà qhà-qhe te la qo cà g̈ə̀ʔ ve ɔ̀-yân gà la ò tɛ̀ʔ šī ve le.
cà mɛ la ve qhà-qhe te ni lɛ šī ve le.
g̈ə̀ʔ qo qhà-nî ni g̈a g̈ə̀ʔ ve le, qôʔ ve.
g̈ə̀ʔ pə̀ qo qhà-qhe te phôʔ ve le.
qhà-qhe te jɔ̀ʔ ve le, qhe qôʔ ve.
T: cà g̈ə̀ʔ ve tí qo chi qhe yò.
ŋà-hɨ ni ve tê yân thâ, chi qhe g̈a šī ve.
cà tɔ̂ʔ la pə̀ qhɔ̀ʔ-nɔ́ qo, yɔ̂ ɔ̀-šī mā la ve tê yân thâ, ŋà-hɨ ni lɛ šī phɛ̀ʔ ve yò.
ɔ̀-šī lɛ̀ hɛ la lɛ ší ɛ̀ phɛ̀ʔ la ve tê yân thâ, cà g̈ə̀ʔ yân gà ò tɛ̀ʔ šī ve pa-tɔ, ŋà-hɨ g̈a g̈ə̀ʔ ve yò.
g̈ə̀ʔ pə̀ ɔ̀-qhɔ̀ʔ-nɔ́ qo g̈a phôʔ ve yò.
phôʔ ve qôʔ ve cɨ́-kɨ̀ lɛ̀ chi qhe cɔ̀ ve yò.
cà mâ phôʔ qo cà-qha mâ dàʔ.
lɛ cà jɔ̀ʔ mâ pì.
P: cà jɔ̀ʔ mâ pì qôʔ ve qhà-qhe ve àʔ qôʔ ve le.
T: mâ pì … mâ pì qôʔ ve cɨ́-kɨ̀ lɛ̀, jɔ̀ʔ lɛ qha-pə̀è mâ ce la.
P: mâ ce la.
T: èe, tê-phā qá tá ve.
ô qhe ve thàʔ qôʔ ve yò.
P: qhà nî ni qhe g̈a phôʔ tɛ á qo jɔ̀ʔ ve le.
T: qha-dɛ̀ʔ-dɛ̀ʔ ɔ̀-lî àʔ qôʔ ve qo, nî há šɛ̂ʔ há phôʔ ve thɔ̂ kàʔ jɔ̀ʔ phɛ̀ʔ ve yò.
lɛ mâ tan ve qo phôʔ tù mâ ve qo tê-qhɔ̀ʔ-qhɔ̀ʔ qo hapa tê mà g̈a phôʔ kɨ̀ kàʔ cɔ̀ ɔ.
tê qhɔ̀ʔ-qhɔ̀ʔ qo nî ší šɛ̂ʔ ší g̈a tɛ ā kɨ̀ kàʔ cɔ̀ ve yò.
chi ve tɛ ā ve g̈a phôʔ pə̀ qhɔ̀ʔ-nɔ́ mû-yè là ve, mû-cha cha ve kàʔ dɔ̂ hā tù mâ lō.
mâ nɛ̂ʔ.
P: qhe qo cà jɔ̀ʔ pə̀ thâ jɔ̀ʔ á ò qo ɔ̄, á-qhɔ ɔ̄ pû kə ve lâ.
qhà-qhe te pû kə ve le.
T: cà jɔ̀ʔ ve tí qo chi qhe yò.
hɛ vɨ̂ ve qo hɛ qhɔ tɛ ve yò.
hɛ qhɔ yɛ̀ te lɛ, phɛ-qō te lɛ, hɛ qhɔ jɔ̀ʔ kə ā ve yò.
lɛ hɛ mâ vɨ̂ ve á-qàʔ á-kɨ cɔ̀ ve qo, tê pɔ̂ʔ tí á-qhɔ pû kə tā ve yò.
P: chi qhe qo chi cà-šī pû kə pə̀ qo pə̀ ve yò lê.
qhe qo ô ve qhà-qhe te ve le.
cà jɔ̀ʔ pə̀ qo chi cà à-thòʔ-ma è ɔ̀-cɛ̀ qôʔ ve qhà-qhe qôʔ ve le, chi Lâhū khɔ̂.
P: ô ve qhà-qhe te tɛ ā ve le.
T: jɔ̀ʔ pə̀ ve tê yân thâ chi qhe Lâhū yâ lɛ̀ vên qhɔ chɔ qha-šū-šū gu tā ve tê cə̀ mâ hêʔ.
cà-cɛ̀-cà-g̈ɔ̂ ô ve thàʔ lɛ̀ qhe-lê jɔ̀ʔ bà lɛ, ɔ̀-phôʔ ɔ̀-phôʔ qhe te tɛ ā ve yò.
lɛ hɛ-g̈ɔ̂ lɛ g̈a qɔ̀ʔ g̈ɔ̂ʔ pɨ́ lɔ qo, cà-g̈ɔ̂ ô ve qha-pə̀ qɔ̀ʔ tâʔ lɛ ɔ̀-qɔ̀ʔ ɔ̀-le tê kà a-cí a-cí tɛ lɛ tú kə lɛ tê pɔ̂ʔ cà qɔ̀ʔ ti câ kàʔ dàʔ ve yò.
P: âa, qhe qo lɛ̀ tê pɔ̂ʔ lɛ̀ Lâhū yâ qhe hɛ thu câ, hɛ cà te câ ve chi, ɔ̀-lɔn láy cə̀ šī pə̀ ò lê.
qhe qo hɛ cà te câ ve ɔ̀-qhɔ lo à-thòʔ-ma à-thòʔ-ma qɔ̀ʔ te câ šɔ̄ le.
lay cə̀ ti ve šama-mì te ve, à-thòʔ-ma mì te ve qhe ve ɛ̀ʔ.
T: hɛ tí te ve tê cə̀ lɛ̀ mâ hêʔ.
ŋà-hɨ Lâhū yâ hɛ-ŋə̂ mɨ̀ câ ve qôʔ ve tê yân thâ hɛ ɔ̀-qhɔ lo nɔ̂ʔ-šī tê g̈ɨ̀ láy-cə̀, á-pɔ̂ tê g̈ɨ̀, pɛ̂-šī tê g̈ɨ̀, qha câ na ve ɔ̀-cə̀ tê phā, qha câ phɛ̀ʔ ve ɔ̀-cə̀ tê-phā ti câ ve yò.
pə̀ lɛ šama-mì kàʔ ti lɛ, šama-mì tí kàʔ tê pêʔ g̈a te ve yò.
šama-mi mâ cɔ̀ qo, ŋà-hɨ Lâhū yâ ɔ̄, vàʔ hu câ ve thàʔ pa-tɔ, vàʔ cā tù mâ cɔ̀ qo phu-ši ca g̈a kɨ̀ mâ cɔ̀.
P: âa, dàʔ jâ ve yò, qhe qo lɛ̀.
chi bə̀ʔ a-cí dɔ̂ hā ve qo Thây jɔ̂-mɔ̂ chi nɔ̀-hɨ àʔ hɛ mâ thu cɨ gâ qôʔ ve chi tê lɔn a-cí dɔ̂ hā à qôʔ-ma lê.
Lâhū yâ chi ɔ̄ hɛ mâ g̈a thu qo ɔ̄, tèʔ-chí câ tù mâ cɔ̀ qôʔ ve lê.
phu-ši à-thòʔ-ma mâ cɔ̀ kàʔ, yà-pî.
cà-šī tê cə̀ tí cɔ̀ kàʔ chɛ̂ phɛ̀ʔ ɔ, qôʔ ve lê.
chi ɔ̄ hɛ ɔ̄ mâ g̈a thu qôʔ qo ɔ̄, chi ɔ̀-pī àʔ tí cû ve lɛ mì-khɨ̂ kə lɛ te câ qôʔ qo ɔ̄ chi ɔ̄ te phɛ̀ʔ tù ɔ̄, hā jâ.
qhe te lɛ ɔ̀-ti ɔ̀-šɨ́ ca ni a, qôʔ qo kàʔ, nɔ̀ qôʔ ve qhe-lê qhe, a-šu kàʔ qhɔ̀ tê kà kàʔ ɔ̀-šɛ̄-phâ cɔ̀ ve dêdê lɛ, ɔ̀-šɛ̄-phâ cɔ̀ ve qôʔ ve thɔ̂ šu te ve mâ mɔ̀.
tê chi qhɔ̀ʔ kàʔ chi qhe bà á ve, nî chi qhɔ̀ʔ kàʔ chi qhe te tù nā â šī ò lê, chi ve ɔ̄.
nɔ̀-hɨ tê gɛ phôʔ lɛ, šu khɔ̂ a-cí šī pā qo, mô ɔ̄ šáná ɔ̄ qay lɛ tɔ̂ ca jɛ̀ ni a qo, dàʔ hɛ́ qôʔ ve lê, jɔ̂mɔ̂ gɛ.
T: yò.
ŋà-hɨ qɔ̀ʔ šu-khɔ̂-šu-šá ši lɛ qɔ̀ʔ qha-dɛ̀ʔ-dɛ̀ʔ tê g̈â le-le šu-khɔ̂-šu-šá yɔ g̈a ve tê cə̀ lɛ̀ mâ hêʔ.
yàʔ-qhâ thɔ̂ ŋà-hɨ dɔ̂ tā ve lɛ̀ tê pɔ̂ʔ pə̀ tê pɔ̂ʔ mâ g̈a lɛ mâ phɛ̀ʔ thâ qha-gà ŋà-hɨ lɔ̀ yù tù dɔ̂ tā ve yò.
mâ g̈a qo mâ g̈a thâ ɛ̀ šī ve tí yò.
lɛ mì-gɨ̀ jɔ̂-mɔ̂ tí qo "mì tɔ̄ kɨ̀ àʔ ca-ʔ" qôʔ thɔ̂, qôʔ lâ ve yò.
yàʔ-qhâ ŋà-hɨ ca lɛ mâ g̈a.
chi àʔ pa-tɔ lɛ ɔ̄ yɔ̂-hɨ a-có-yàʔ hàʔ-qá lɛ ŋà-hɨ àʔ ga lâ ve tê cə̀ mâ hêʔ qo lɛ̀, ŋà-hɨ Lâhū yâ ɔ̀-pon tí qo lɛ̀ hɛ kàʔ mâ g̈a thu qo, timi kàʔ mâ cɔ̀ qo, chi bə̀ʔ hā ve a-kɛ́, lə́ lɛ ɔ̀-g̈û-šɨ̄ kàʔ qɔ̀ʔ hā qay tù yò.
ɨ̄-la-mu-la mâ phɛ̀ʔ ò tà hɛ́.
P: yɔ̂-hɨ nɔ̀ àʔ qôʔ ve kā-phī mì, í-šī kho, láy-cə̀ te câ ve qôʔ ve chi ɔ̄, g̈a câ ɔ, qôʔ ve chi ve ɔ̄ â phɛ̀ʔ lɛ lâ.
qhà-qhe te ve le, chi ve ɔ̀-lɔn ɔ̄.
T: chi ve yò.
ŋà-hɨ Lâhū yâ lɛ̀ yɔ̂-hɨ qôʔ ve qhe te g̈a qhe tí qo, g̈a câ tù yò.
yàʔ-qhâ í-šī mì te g̈a thɔ̂, í-šī cɛ̀ vɨ̀ mâ phɛ̀ʔ.
vɨ̀ tù phu mâ cɔ̀.
te tù phu mâ cɔ̀.
: ɔ̀-yân mâ cɔ̀.
hâʔ-hâʔ mâ g̈a câ.
: chi thàʔ pa-tɔ chi mâ te g̈a šē ɔ̀-kā ɔ̀-qhɔ lo, câ tù ŋà-hɨ Lâhū yâ ɔ̀-pon hā jâ ve tê cə̀ yò.
lɛ nî lɔn tê lɔn qo í-šī cɛ̀ vɨ̀ tù phu tê-phā thɔ̂ kàʔ, phu mâ cɔ̀ qo vɨ̀ mâ g̈a.
tê cə̀ le-le phu àʔ tí g̈a yɛ̂ ve pa-tɔ, chi qhe te lɛ g̈a câ tù ve tê cə̀ lɛ̀ ŋà-hɨ ɔ̀-pon lɛ̀ dɔ̂-hā ve yò.